Воени лекари во Шри Ланка го извадиле најголемиот и најтешкиот камен во бубрегот на светот во текот на операција на пензиониран војник, соопшти војската на Шри Ланка.
Добиј ги најважните вести, бесплатно на Viber
На 62-годишен поранешен подофицер му бил отстранет камен од бубрег од 801 грам, што е повеќе од пет пати поголема од тежината на просечен машки бубрег, според армијата.
Каменот бил долг 13,37 см, а просечниот бубрег е долг од 10 до 12 см.
„Најголемиот и најтешкиот камен во бубрегот во светот е отстранет по хируршки пат на 1 јуни во воената болница во Коломбо“, се наведува во соопштението на војската.
Оваа вест беше објавена откако рекордот го призна Гинисовата книга на рекорди.
Претходниот рекорд – 620 грама – за камен во бубрег е пријавен во 2008 година во Пакистан, наведува Гинис.
„Најважно за нас е бубрегот да работи нормално и покрај големината на каменот“, рекол воениот хирург К. Сутаршан.
Воениот пензионер изјавил за локалната телевизија дека од 2020 година трпел болки во стомакот, а лековите што ги земал воопшто не му помогнале.
Камењата во бубрезите се формираат со таложење на минерални соли во бубрегот, орган кој ја прочистува крвта.
