Ако имате парче земја, дури и само неколку квадратни метри, добро е наесен да ги посеете овие култури. Така напролет можете значително да заштедите на храна и да имате свеж зеленчук од сопствената градина.

Градинарството е една од активностите кои можат позитивно да влијаат врз телото, умот и општото расположение. Престојот на отворено и работата во градината можат да помогнат во намалување на стресот, а самото занимавање со растенија носи чувство на задоволство и исполнетост.

Затоа, оваа есен искористете ја паметно. Доколку имате и најмало парче земја, засадете неколку култури кои добро ги поднесуваат ниските температури и можат да ви обезбедат свеж зеленчук уште во рана пролет.

Еве кои растенија можете да ги засадите:

1. Лук и  кромид

Се садат во октомври и ноември, а со соодветни услови можат да се берат уште во рана пролет. Есенското садење овозможува растението да се вкорени пред зимата и да продолжи со растот штом температурите ќе се зголемат.

2. Спанаќ и зелена салата

Овие култури добро ги поднесуваат пониските температури. Можат да се берат доцна во есен или рано напролет, особено доколку во постудените периоди се заштитат со агротекстил.

3. Ротквици

Ротквиците растат релативно брзо и можат да се берат пред да настапат силните мразеви. Со правилно планирање, можете да уживате во свежи ротквици уште пред да започне главната пролетна сезона.

4. Грашок

Зимските сорти грашок, засадени во доцна есен, можат да дадат плод значително порано од оние што се садат напролет. На тој начин првата берба може да ја очекувате многу порано во сезоната.

Замислете само – ако сега ги посеете овие култури во градината, напролет ќе можете да имате свежи, домашни производи без да мора да ги купувате од продавница.

Покрај салатата, кромидот, спанаќот и грашокот, во градината можете да засадите и повеќегодишни зачински билки како рузмарин, мајчина душица, нане и жалфија. Тие можат да ја збогатат градината и да ви обезбедат свежи зачини во текот на сезоната.