Во саботата Трамп одржа трилатерален состанок во Париз со Макрон и Зеленски на тема војната во Украина и начините за нејзино завршување.
Новоизбраниот американски претседател Доналд Трамп изјави дека Украина и нејзиниот претседател Володимир Зеленски сакаат да склучат договор за крај на војната со Русија и повика на итен прекин на огнот и почеток на мировни преговори. Ова е првпат да се посочува дека Зеленски е подготвен да се договори со Путин , а сега ја чекаме реакцијата на Москва. Се чини дека мировниот договор е веќе на повидок и ќе биде финализиран следната година.
Во саботата Трамп одржа трилатерален состанок во Париз со Макрон и Зеленски на тема војната во Украина и начините за нејзино завршување. Ова е првпат Трамп да се сретне со Зеленски по победата на изборите.
– Зеленски и Украина би сакале да се договорат и да го запрат лудилото. Тие изгубија смешни 400.000 војници и многу повеќе цивили. Треба веднаш да има прекин на огнот и да почнат преговори – порача Трамп на својата социјална мрежа.
Тој изјави дека непотребно се трошат премногу животи, дека се уништуваат премногу семејства, а ако вака продолжи, додаде, „може да се претвори во нешто многу поголемо и многу полошо“.
– Добро го познавам Володимир . Ова е негово време да дејствува. Кина може да помогне. Светот чека! – рече Трамп, кој во саботата се сретна со Зеленски во Париз на маргините на свеченото отворање на реновираната катедрала Нотр Дам во Париз.
Зеленски: Мирот мора да вклучува цврсти гаранции за да се спречат идни конфликти
Претседателот на Украина го соопшти ова по средбата со Макрон и Трамп во Париз.
Зеленски посочи дека мирот не може да се постигне само со потпишување договор, туку мора да содржи цврсти гаранции кои ќе спречат идни конфликти. Според него, Украина не може да прифати едноставно примирје без услови кои би спречиле продолжување на агресијата.
Зеленски ги повика Америка и меѓународната заедница да помогнат да се обезбеди мир преку одлучност и единство. Тој посочи дека Украинците сакаат мир повеќе од кој било друг, но дека се свесни дека без цврсти гаранции, конфликтите можат повторно да се разгорат.
„Макрон го убеди Трамп да се сретне со Зеленски во Париз“
Францускиот претседател во последните денови работи на тоа да го убеди Трамп да одржи заедничка средба со Зеленски, објави американскиот портал „Аксиос“, повикувајќи се на два неименувани извори.
Еден извор рече дека Трамп првично се двоумел дали да ја одржи средбата, но на крајот се согласил. Друг извор запознаен со ситуацијата рече дека средбата траела 45 минути и дека била „добра и плодна“ . Изворот наведува и дека конечната одлука за одржување на трилатералната средба била донесена „малку порано“.
Самиот Зеленски рече дека средбата била „добра и продуктивна“ и додаде дека разговарале за ситуацијата на теренот и „праведниот мир“ и се договориле да продолжат да работат заедно и да останат во контакт.
– Претседателот Трамп, како и секогаш, е одлучен… Сите сакаме оваа војна да заврши што е можно поскоро и на фер начин. Мир преку сила е можен – напиша Зеленски на „Х“.
Аналитичарите сугерираат дека средбата меѓу Трамп и Зеленски е знак дека новоизбраниот американски претседател веќе работи на мировен договор, а сега се чека реакцијата на Владимир Путин.
Зеленски ги откри загубите во војната
По состанокот во Париз , Зеленски рече дека Русија претрпе повеќе од 750.000 жртви, вклучувајќи 198.000 загинати војници, додека украинските загуби вклучуваат 43.000 загинати војници и 370.000 ранети.
Тој, исто така, предупреди за илјадниците Украинци кои сè уште се во руско заробеништво, вклучувајќи војници, цивили и деца кои беа насилно депортирани во Русија. Тој рече дека враќањето на тие луѓе е една од најтешките задачи во овој конфликт.
Трамп го кажа истото.
Песков: Загубите на Украина се многукратно поголеми, Киев одбива преговори
Портпаролот на Кремљ , Дмитриј Песков , сепак тврди дека загубите на украинската армија се многукратно поголеми од оние на Русите на фронтот.
– Што се однесува до бројките дадени од Трамп за загубите на двете страни, очигледно е дека тие се претставени во украинското толкување и ја одразуваат официјалната позиција на Украина, вистинските бројки за загубите се сосема различни: украинските загуби се многукратни повисоки од загубите на руска страна – рече Песков.
Според него, условите за мировните преговори претходно ги објави рускиот претседател Владимир Путин, но Украина, како што наведе, се уште одбива да преговара и не ја менува својата позиција.
– Овде е важно да се потсети дека Украина беше таа која одби и продолжува да ги одбива преговорите, Зеленски со декрет си забрани себеси и неговата администрација да имаат какви било контакти со руското раководство – истакна Песков.
Тој истакна дека, за Зеленски да стигне до „мирен пат“, би било доволно „да се откаже тој указ и да се даде инструкции за продолжување на дијалогот врз основа на Истанбулските договори“, земајќи ја предвид реалноста на теренот.
Нов пакет помош од САД за Киев вреден 988 милиони долари
Во меѓувреме, Пентагон објави дека САД доделиле нов пакет воена помош во вредност од 988 милиони долари за Украина како дел од новата програма за набавка на оружје.
– Министерството за одбрана најави значаен нов пакет безбедносна помош. Овој пакет за безбедносна помош вклучува дополнителни 988 милиони американски долари за поддршка преку Иницијативата за безбедносна помош во Украина (УСАИ) , се вели во соопштението.
Средствата ќе бидат распределени како дел од програмата за купување ново оружје, а не со отпишување од залихите на американската војска.
Новиот пакет на воена поддршка вклучува муниција за повеќе ракетни фрлачи „ХИМАРС“, беспилотни летала, како и опрема и резервни делови за поправка и одржување на артилерија, тенкови и оклопни возила.
