Зошто вреди повторно да го вклучите во утринското мени?
Скромна и едноставна, палентата некако неправедно е запоставена во време кога пекарниците ни нудат безброј брзи опции за појадок. А всушност, за нејзина подготовка потребни се само неколку минути и неколку состојки што најчесто веќе ги имаме во кујната.
Предноста на палентата е тоа што може да се приспособи на речиси сечиј вкус. Некој ја сака во наједноставна варијанта, со малку сол, додека други не можат да ја замислат без домашно сирење, кајмак или кисело млеко. Одлично се комбинира и со сланина или пржени парчиња свинска маст.
Зошто вреди повторно да ја вклучите во утринското мени?
Пченкарниот гриз содржи јаглехидрати кои му обезбедуваат енергија на организмот, а во зависност од видот и степенот на обработка, може да содржи и одредено количество растителни влакна, важни за нормалното функционирање на дигестивниот систем.
Освен тоа, за подготовка не се потребни посебни кулинарски вештини, не го оптоварува домашниот буџет и е одлично решение кога немаме многу време за појадок.
Еве еден едноставен рецепт за домашна палента.
Домашна палента – рецепт за една порција
Потребни состојки:
- 2 дл вода
- 2 и пол лажици палента
- 1 лажичка сол
- 1 лажичка маст или масло
Начин на подготовка:
Истурете ја водата во помало тенџере, додајте сол и маст или масло, па почекајте да зоврие.
Кога водата ќе почне да врие, тргнете го тенџерето накратко од ринглата и постепено додавајте ја палентата, со постојано мешање за да не се создадат грутки.
Вратете го тенџерето на рингла, на пониска температура, и варете уште две до три минути, односно додека не ја добиете посакуваната густина.
Доколку користите инстант-палента, следете ги упатствата на производителот, бидејќи времето на подготовка може да се разликува.
Послужете ја додека е топла, бидејќи тогаш е највкусна и најкремаста.
Со што најдобро се комбинира палентата?
Доколку ги сакате традиционалните вкусови, додајте малку издробено бело сирење или една лажица домашен кајмак.
Со чаша јогурт или кисело млеко ќе добиете појадок што потсетува на некогашните семејни трпези.
За похранлива варијанта, можете да додадете мелено ленено семе, сончоглед или семки од тиква, кои ќе го збогатат оброкот со растителни влакна и здрави масти.
Малку ајвар, пак, ќе ѝ даде сосема поинаква арома.
Едноставна, евтина и брза за подготовка, палентата е старинско јадење кое заслужува повторно да се најде на нашите трпези.
