Православна црква во четврток, 21 мај, го одбележува Спасовден, празникот Вознесение Господово, кога според преданието Исус Христос се вознел на небото и седнал од десната страна на Бога.
Спасовден е подвижен празник кој секогаш се слави 40 дена по Велигден, а бидејќи е обележан со црвена буква во црковниот календар, многу верници се прашуваат дали на тој ден треба да се пости или не.
Вознесението Господово, во народот познато како Спасовден, спаѓа меѓу 12-те големи Господови празници. Секогаш се одбележува 40 дена по Велигден и десет дена пред Света Троица, односно Духовден.
Бидејќи Велигден секогаш паѓа во недела, Спасовден традиционално се празнува во четврток, а во народот се смета за еден од најсреќните денови во годината.
Иако е означен со црвена буква, што значи дека станува збор за голем празник, Спасовден не е посен ден — напротив, на тој ден не се пости.
Во српската традиција долго време важело правило од Нова година, која според јулијанскиот календар паѓа на 14 јануари, па сè до Спасовден да не се користи млеко ниту јадења подготвени со млечни производи. Затоа, на самиот празник како прв залак често се јаделе јагоди, со верување дека годината ќе биде слатка, бериќетна и успешна.
Потоа домаќинките изнесувале цицвара — првото млечно јадење кое повторно се јадело по подолг период на воздржување.
За ручек традиционално се подготвувало и јагнешко месо, особено во домаќинствата кои го слават Спасовден како куќна слава.
Старите обичаи налагале и тој ден да не се оди на нива и да се избегнува дневно спиење, бидејќи се верувало дека оној што ќе задреме попладне на Спасовден ќе биде поспана личност во текот на целата година.
